МБУК СКИЦ "ЭЙГЭ" С.ТЮНГЮЛЮ Ыам ыйын 23 күнүгэр Төҥүлү нэһилиэгэр үтүө үгэскэ кубулуйбут, Марфа Березина көҕүлээһининэн, 11-с Хоту эҥэр култуура үлэһиттэрин спартакиадата буолан ааста. Бу күн 3-с Мэлдьэхси, Дойдуунускай, Мөҥүрүөн, Мэҥэ, Араҥас, Төҥүлү кулууптара муһуннулар. Дьиэҕэ бэриллибит сорудаҕы толорон, профсоюз хаһыатын оҥорон аҕалан көмүскээтилэр. Манна Мэҥэ нэһилиэгин кулууба 1 миэстэни, Т.А. Свинобоева аатынан 3-с Мэлдьэхси кулууба 2 миэстэни, Мөҥүрүөн нэһилиэгин кулууба 3 миэстэни ыллылар. Маны таһынан 3 хамаандаҕа арахсан профсоюз блиц турнирыгар боппуруостарга эппиэттээн күрэхтэстилэр. Үгэс буолбут көрүҥнэргэ: волейболга, эстафетаҕа,«Көрдөөх стартарга», канат тардыһыытыгар, үс хамаандаҕа арахсан илин-кэлин түһүстүлэр. Хамаандалар көрүҥ аайы анал мэтээллэринэн, грамоталарынан наҕараадаланнылар.
Маны сэргэ, түмсүбүччэ биир идэлээхтэр күүстээх күрэхтэһии кэнниттэн, шашлык амсайан, дэлэй астаах сандалы тула олорон ирэ-хоро кэпсэтэн, үөрэн-көтөн, сынньанан, оонньоон-көрүлээн, сэргэхсийэн тарҕастыбыт.
