МБУК СКИЦ "ЭЙГЭ" С.ТЮНГЮЛЮ Сахабыт сиригэр үүммүт 2022 сыл Ил Дархан Айсен Николаев туһаайыытынан Ийэ сылынан биллэриллэн турар.
Ийэ сылын логотиба оҥоһулларыгар экспердэринэн историческай наука кандидата, фольклор уонна култуура кафедратын доцена, Арассыыйа худуоһунньуктарын сойууһун чилиэнэ Светлана Ивановна Петрова уонна СӨ норуот уус-уран оҥоһуктарын маастара, Таатта улууһун норуотун маастара Парасковья Васильевна Макарова сырыттылар. Көрөргүт курдук, ийэ уобараһа илиитигэр оҕотун бигээн истиҥник уонна нарыннык бэриллибит, оҕолоох ийэни дурда-хахха бэлиэтэ араҥаччылыыр, онтон харысхал оһуордара бары тус-туһунан суолтаны илдьэ сылдьаллар, уруһуй тутула күөх чээлэй өҥҥө дьүөрэлэһэн киирбиттэр.
Өрөспүүбүлүкэҕэ Ил Дархан Айсен Николаев Саха АССР тэриллибитэ 100 сылын туолар үбүлүөйдээх сылыгар биллэрбит Ийэ сыла саҕаланна. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
2022 сылга дьахталларга, ийэлэргэ саастарыттан, олорор сирдэриттэн, социальнай балаһыанньаларыттан тутулуга суох, бары өттүттэн болҕомто күүһүрэр. Холобур, Дьарыктаах буолуу кииннэригэр эбии үөрэнэллэригэр, саҥа идэни баһылыылларыгар, үлэ булалларыгар усулуобуйа оҥоһуллуоҕа. Дьахтар доруобуйатын бөҕөргөтөргө саҥа бырагыраамалар үлэлиэхтэрэ.
5-тэн элбэх оҕолоох ыалларга дьиэ атыылаһарга төлөбүр бэриллэр. Билиҥҥитэ уочарат хамсыыра олус бытаан. Бу бырагыраамаҕа эбии үп көрөн, дьиэ ылалларын түргэтэтэргэ, биэс сыл иһинэн бу боппуруос быһаарыллыаҕа. Ону тэҥэ, биэстэн элбэх оҕолоох ыаллар дьиэ нолуогуттан толору босхолоноллор. Оттон оҕону иитэ ылар дьиэ кэргэттэргэ төлөбүр суумата икки төгүл үрдүөхтээх.
Үс сыл иһигэр Дьокуускайга дьиэ кэргэттэргэ уонна оҕолорго социальнай көмө киинэ тутуллуоҕа. Бу киин олох араас очурдарыттан ыарахан балаһыанньаҕа түбэспит дьиэ кэргэттэргэ, оҕолорго көмөлөһөр сыаллаах үлэлиэҕэ.
2022 сылга төрөөбүт оҕолорго барыларыгар бэриллэр «100 сыл оҕолоро» хапытаал эмиэ үгүс дьиэ кэргэттэргэ дьоһун көмө буолуоҕа. Билиҥҥитэ 700-чэ ыалга сертификат туттарылынна.