МБУК СКИЦ "ЭЙГЭ" С.ТЮНГЮЛЮ Кулун тутар 19 күнүгэр Төҥүлү нэһилиэгэр дуобат, саахымат дьоро күнэ үүннэ. Надежда Оконешникова сэбиэдиссэйдээх «Сайдам» уопсастыбаннай түмсүүлэр кииннэригэр М.Горькай аатынан сопхуоска кылаабынай инженер-мэхээнньигинэн, кэлин ДьУоКХ мэхээнньигинэн
үлэлээбит, дуобат, саахымат успуордун, үлэ бэтэрээнэ, «Норуот айымньытын сайдыытыгар кылаатын иһин»
бэлиэлээх, Найахы, Төҥүлү норуодунай хуордарын бэтэрээнэ, Мэҥэ Хаҥалас улууһугар сцена бэтэрээнэ Николай Афанасьевич Оконешников кэриэһигэр тэриллибит турнир үрдүк тэрээһиннээхтик ыытылынна.
Төҥүлүтээҕи «Эйгэ» култуура киинин үлэһиттэрэ тэрээһини
үөрүүлээхтик астылар. Норуодунай хуор ырыаһыта Анатолий Свинобоев,
«Ситим»
үҥкүү бөлөҕө уонна култуура киинин үлэһиттэрэ ырыанан-үҥкүүнэн киэргэттилэр.
Николай Афанасьевич огдообото Надежда
Оконешникова, кылаабынай судьуйа Гаврил Данилов,
успуорт комплекс дириэктэрэ Алиса Куприянова, саахымаччыт Милентий Каплин үстүү киһилээх тоҕус хамаанданы күөн көрсүһүннэрдилэр. Дуобакка биир эр киһи, биир дьахтар, саахымакка 1 эр киһи састааптаах аҥаардас Төҥүлүттэн биэс хамаанда кытынна. Ону таһынан биир туспа хамаанданан Төҥүлүтээҕи ОДьКХ хамаандата кииристэ.
Майаттан ОДьКХ хамаандата Бочуоттаах ыалдьыт быһыытынан
ыҥырыллан тиийдэ.
Нуораҕанаттан уонна Маттаттан биирдии хамаанда кытынна.
Тыҥааһыннаах киирсиилэр түмүктэринэн бастакы миэстэни Төҥүлү
бастакы хамаандата ылары ситистэ. Манна саахымакка Милентий Каплин, дуобакка Гаврил Данилов, дьахталларга Евдокия Ноговицына тэҥнээхтэрин булбатылар. Иккис бириистээх миэстэҕэ саахымакка Василий Эверстов, дуобакка Егор Стручков,
Евгения
Ильина састааптаах Майаттан ОДьКХ хамаандата таҕыста. Үһүс бочуоттаах миэстэни саахымакка Дмитрий Ченянов, дуобакка Дмитрий Харитонов, Лидия Николаева састааптаах Төҥүлү төрдүс хамаандата хааччынна. Ити кэнниттэн дуобакка уонна саахымакка түргэн оонньуу буолла. Манна саахымакка Милентий Каплин бастаата, дуобакка Гаврил Данилов кыайда уонна дьахталларга Маттаттан сылдьар Светлана
Птицына бастаата.
Миэстэлэспит хамаандалар мэтээллэринэн, грамоталарынан наҕараадаланнылар, харчынан бириэмийэлэннилэр. Биирдиилээн бастаабыттар сыаналаах бириистэри туттулар.
Күрэхтэһиини Гаврил Данилов баһылыктаах Төҥүлү олохтоох дьаһалтата, Оконешниковтар дьиэ кэргэн тэрийдилэр, урбаанньыттар Иван Борисов, Иван Максимов сүрүн успуонсардарынан буоллулар.
Күрэхтэһээччилэр дуобат, саахымат дьоро күнүн тэрийбит олохтоох дьаһалтаҕа, Оконешниковтар дьиэ кэргэннэригэр махтанан тарҕастылар.