Николай Николаевич Сорокин

Николай Николаевич 1962 сыллаахха атырдьах ыйын 21 күнүгэр Мэҥэ Хаҥалас улууһун Төҥүлү бөһүөлэгэр Сорокиннар дьиэ кэргэннэригэр төрдүс оҕонон күн сирин көрбүтэ. 9 сааһыттан концертарга баяҥҥа оонньоон кыттан барбыта. Төҥүлү орто оскуолатыгар 1 кылааска киириэҕиттэн 9 кылааһы бүтэриэр диэри оскуола солбуллубат ырыаһыта буолбута. 9 кылаас кэнниттэн Дьокуускай куорат 1 № дээх педагогическай училищетын музыкальнай отделениятыгар үөрэнэ киирбитэ. Онно 2 ый үөрэнэн баран, төннөн тахсан Төҥүлүтээҕи 4 нүөмэрдээх училищеҕа тракторист-машинист идэтигэр үөрэммитэ. Бу кэмнэртэн ыла саҕалаан кини мелодия айар дьоҕура биллибитэ. 1980 с. С.Спиридонова тылларыгар “Хатыҥнар” диэн бастакы ырыатын суруйбута. Бу ким да мелодиятыгар маарыннаабат, ураты истиҥ-иһирэх ырыа буолбутта. Төҥүлү нэһилиэгин чиэһин араас таһымнаах күрэхтэргэ көмүскээн, улуус, республика конкурстарын элбэх төгүллээх кыайыылааҕа, лауреата, дипломана буолан дьонун-сэргэтин үөрдэрэ. 17 сааһыгар, училищеҕа үөрэнэ сылдьан олоҕун аргыһын көрсөн, 5 оҕону төрөтөн, элбэх сиэн эһэтэ буолбута. 1983 сыллаахха Төҥүлү кулуубугар баяниһынан киирбитэ. Мэҥэ-Хаҥалас улууһун «Дьүрүлгэн» мелодистар түмсүүлэрин чилиэнэ. Улууска ыытыллар культура уонна спорт эстафетатыгар элбэх сыл ыллаан , байааҥҥа доҕуһуоллаан, атын да араас тэрээһиннэргэ, күрэхтэргэ, кэнсиэртэргэ улууһун, Төҥүлүтүн элбэхтэ ааттаппыта. М.П.Куличкинаны кытта олус табыллан үлэлээн, сороҕор күҥҥэ иккилии ырыаны айан, биир дойдулаахтарыгар уостан түспэт ырыалары бэлэхтээн хааллабыттара. Дьон-сэргэ сөбүлээн истэр, ыллыыр ырыалара «Эн эрэ», «Ыйдаах киэһэ», «Ырыам уонна сибэкким», «Сулустар», «Үрүҥ түүн», «Сүгүрүйэ таптыыбын», «Айан ырыата», «Ыллыкчаана» уо.да.а буолбуттара. 2009 сыллаахха «Ырыам уонна сибэкким» диэн ырыаларыттан таҥыллыбыт дискэтэ сүрэхтэммитэ. 30 тан тахса ырыа автора, мелодист, самодеятельный композитор, СР культуратын туйгуна. 2012 сыллаахха Россия журналистарын чилиэнэ Н.Н.Тарабукин тылларыгар, Николай Сорокин мелодиятыгар «Тупса тур, Эн Хотун Төҥүлү» диэн айымньы Төҥүлү нэһилиэгин Өрөгөй ырыатынан биир санаанан ылыныллыбыта. Николай Сорокин 2012 сыллаахха эмискэ бу күн сириттэн барбыта. Биир дойдулаахпыт, кини үгүс ырыалара эдэр ыччакка ылланыа, үтүө аата ааттана туруо.

2014 сыллаахха эдьиийэ, РФ уопсай үөрэхтээһинин бочуоттаах үлэһитэ, СР үөрэҕириитин туйгуна, СР учууталларын учууталлара Л.Н.Назарова «Үөһэттэн одуулуом, мин сулус буоламмын» диэн Н.Н.Сорокиҥҥа аналлаах ахтыылар хомуурунньуктарын таҥан таһааттарбыта. Манна Николай Сорокин чугас дьонун, аймахтарын, бииргэ алтыспыт доҕотторун, кинини чугастык билэр дьон ахтыылара киирбиттэр. Маны сэргэ Николай Николаевич ырыалара, ноталара, элбэх хаартыскалар тиһиллибиттэр.

Николай Сорокин толоруутугар — «Үрүҥ түүл», Марфа Куличкина тыллара.,Николай Сорокин мелодията.

Николай Сорокин толоруутугар — «Сулустар», Д.Андросов тыл., Н.Сорокин мел.

Николай Сорокин толоруутугар- «Саҥа дьылга», Марфа Куличкина тыл., Н.Сорокин мел.

Николай Сорокин толоруутугар — «Эн эрэ», Анатолий Баишев тыл., Н.Сорокин мел.

Николай Сорокин толоруутугар — «Нуораҕанам чараҥар», И.Баишев тыл., Н.Сорокин мел.

Николай Сорокин толоруутугар — «Айан ырыата», В. Барабанскай тыл,Н.Сорокин мел.

Николай Сорокин толоруутугар «Ырыам уонна сибэкким», И.Егоров тыл., Н.Сорокин мел.

Николай Сорокин толоруутугар «Күөх сааһы ахтыбыт киһиэхэ». Иван Федосеев тыл., Н.Сорокин мел.